martes, 27 de mayo de 2008

MELITARS AU D'ASTI!!


O Echerzito colonial ESPAÑOL pasea as suyas armas por meya Zaragoza


O 1 de Chunio se ba a zelebrar en Zaragoza o diya d’as Fuerzas Armadas españolas. Ba a estar una chornada pro belizista empentada por os partius politicos que se dizen no biolentos y democratas, que antimás son empentando a istalazión d’una base d’a OTAN en Zaragoza. I partiziparán más de 3.000 efectibos y todas as suyas armas d’alta tecnolochía d’os tres echerzitos (10 cazabombarders, F1’s, Eurofighter, Harrier, Ercules, Elicopters,…). Nomás fa dos añadas que un melitar murió y 11 escolars estión ferius en Monzalbarba (Zaragoza), cuan iste feba o bamboso con un tanque debán d’ellos.


As chornadas no se reduzen a un diya, sino que se i adibe una semana d’actibidaz a zaguers de Mayo con enchaquia d’o sanguinario y populista bizentenario d’a Guerra d’a Independenzia (en a que se contrimostró lo sanselo y ipocrita d’una enrestida melitar, que en iste caso estió refusada por un echerzito popular). Atra d’as enchaquias por las que se ha dezidiu de zelebrar iste diya en Aragón ye o desembolique d’a EXPO en Zaragoza que “tiene un ligallo tradizional con as Fuerzas Armadas”. Entre as actibidaz a fer a semana d’antis destaca tamién una chura de bandera popular (no se que de popular puede tener a chura enta un siñal imposau durante sieglos) y un omenache, con puyada d’o siñal colonial español en a Pza. Santa Engrazia.


O echerzito español, dimpués de 300 añadas, tiene ocupau o 33% d’o termino monezipal de Zaragoza. Tot isto se debe a furtos, expropiazions, zesions, permutas desfaborables…. operazions ta endeudar a os conzellos a costa de l’echerzito español y enamplar campos de maniobras como o de San Gregorio en as añadas 70’s que pasaría d’unas 4000 ha dica más de 33.000. U aprobeitando-se de dictaduras como a de Primo de Rivera y Franco ta obtener una gran expansión d’o territorio melitar. U creyar a embaxada melitar española en Aragón, con nombre d’Academia General melitar, que dica fa poco teneba encara a estatua ecuestre d’o suyo fundador en o branquil.


Un echerzito, o español, de naturaleza golpista que estió a punto de forzar atro golpe d’estau a trabiés de belunos d’os suyos chenerals con enchaquia de l’Estatut de Catalunya u a Lei d’a Memoria istorica. Abría estau unatro más dentro d’a gran cantidat que en ha abiu en as zaguers 250 añadas; y Aragón, de nuebas, zentro d’atra guerra Zebil.

En Aragón no podemos aconortar-nos con continar mantenendo a una crica de biolentos y golpistas. Dende l’independentismo aragonés no podemos tolerar más a sumisión enta l’echerzito español y a guerra. Se ha a menister que tot lo mundo sepa d’a situazión d’Aragón, dominada de tot por un echerzito que partizipa en masacres, empenta a biolenzia y fa creyar una industria d’a muerte a o suyo redol. No podemos tolerar que os politicos d’os partius en o poder puedan fer fabors a l’echerzito d’a muerte sin garra consecuenzia.


Por ixo femos un clamamiento ta o diya 1 de Chunio y os anteriors, ta que todas y toz acudamos enta las actibidaz organizadas en refuse d’ista mena d’actos en Aragón; y en espezial a la de l’1 de Chunio a las 12 en l’abda Goya.


Entalto Aragón libre y sozialista!


No hay comentarios: