Dende lo Sindicato Obrero Aragonés animamos a la chent a que s’acerquen a l’acto conchunto que diversas organizacions aragonesistas hemos convocau pa lo 23 d’abril, a las 10:30 en a plaza d’Aragón, chunto a lo monumento a lo Chusticia, baixo lo titol “Aragonesismo activo, Aragón vivo”.
Lo Sindicato Obrero Aragonés entiende lo suyo activismo
aragonesista e de clase baixo las ideas d’o comunicau que publicamos aquí
mesmo:
Somos Pueblo. Somos clase treballadera. Personas que luitan e
se comprometen con un país como lo nuestro dende lo espacio sindical. 23
d’abril, Día Nacional d’Aragón e per ixo queremos recordar que la sobiranía no
te la dan. Se gana día sin d’atro. En SOA lo sabemos bien.
Per ixo luitamos cuentra barbaridaz como la de Canal Roya,
pa que no se beneficien es de siempre. Igual que cuentra lo tsunami de megaparques
de renovables, que estricalla lo territorio e lo paisache sinse garra tipo
d’escrúpol. U cuentra Yesa e lo suyo recrecimiento suicida. Tamién
cuentra Mularroya, una obra egoísta que retratará a muitos dintro d’uns
anyos. Pa que cese la violencia masclista en totas las suyas formas, con
ixe patriarcau que afoga e oprime las mullers. Per la oficialidat d’as
nuestras lenguas, empentaremos dica que ixe dreito siga una realidat.
Cuentra los desfiuzamientos, que han d’aturar-se e a favor d’a
expropiación forzosa de los que quieren espicular con un tema tan vital. Per
unas Relacions Laborals acordes con o nuestro lechitimo dreito a
decidir. A la finitiva, cuentra la espanyolización d’Aragón e cuentra
los complices que se disbrazan con a “cuatribarrada” e només sirven a los
intereses d’o capital.
Per ixo i ha un goteyo de movilizacions variadas en os
zaguers meses. Lo sistema se creba e no ufre solucions aceptables, a no estar
que formes part d’os oligopolios de siempre. Los mesmos que tienen Aragon
“engarcholau”, gracias a los poders facticos e a un gubierno inepto, per acción
u omisión. En 2020 plantiamos que tocaba reflexionar, agora arriba lo momento
de levantar-se e empuixar.
Somos las mullers que luitan cuentra las inchusticias. Los
obrers que se deixoron la piel en piquez e vacas. Las activistas que no reblan
en o suyo día a día. Los paisanos que defienden lo nuestro medio rural. Somos
UN PAÍS PER EMANCIPAR.
#23Abril #SinReblar #VenteConSOA
No hay comentarios:
Publicar un comentario