L’Aria d’ensinyanza d’o SOA-STA hemos presentau una reclamación formal a lo Departamento d’Educación pa que se reubra la lista de mayestros de lengua aragonesa.
Hemos observau cómo cuantas plazas se quedoron sin cubrir lo curso pasau, per los integrants d'a lista, pero que cuan salioron como extraorinarias e i podioron optar chent que no yeran en a lista, sí que se cubrioron. Este anyo, ya ha pasau una atra vez.
Esto, seguntes nusatros lo veyemos, chenera doble greuche. Per una part sobre l’alumnau, que puet pasar largos períodos de tiempo sin fer las clases d’aragonés pero tamién atras asignaturas que este mayestro u mayestra puet tener asignadas. Per una atra part, en os propios mayestros e mayestras que tenendo los conoiximientos e titulacions no puedan optar a ditas sustitucions per no figurar en a lista de candidatos.
Per tot esto, dende l’Aria d’Ensinyanza d'o SOA-STA, entendemos que dita lista s’ha quedau “curta” pa la demanda que la lengua aragonesa tien actualment e, estando conoixedors de que existen mayestros con a mención de Lengua Aragonesa que han terminau los suyos estudios de machisterio con posterioridat a la zaguera apertura d'a citada lista, hemos rechistrau un expone e solicita, en o que desenrollamos més detalladament esta cuestión. E demandamos que, aproveitando la rebaremación que deberá producir-se pa deciembre, se proceda a l’apertura d'a lista de mayestros de Lengua Aragonesa existent en l’actualidat.
No hay comentarios:
Publicar un comentario